Tərtərdə 2 fevral – Azərbaycan Gəncləri Günü münasibətilə rayon İcra Hakimiyyətinin,
YAP rayon təşkilatının və Qarabağ Regional Gənclər və İdman İdarəsinin birgə
təşkilatçılığı ilə tədbir keçirilib.
Tədbirdə Tərtər Rayon İcra Hakimiyyətinin başçısı Müstəqim Məmmədov, YAP rayon
təşkilatının sədri Eldar Əsədov, Qarabağ Regional Gənclər və İdman İdarəsində İnzibati
Təşkilat sektorunun müdiri Anar Şahbazov, qazilər, təhsil, səhiyyə, mədəniyyət
sahəsində çalışan, rayonun ictimai-siyasi həyatında fəal iştirak edən gənclər, könüllülər
və gənc idmançılar iştirak ediblər.
Tədbir iştirakçıları əvvəlcə Mərkəzi Meydanda müstəqil Azərbaycanın memarı və
qurucusu Ulu Öndər Heydər Əliyevin abidəsini ziyarət edib, önünə gül-çiçək dəstələri
düzüblər.
Sonra tədbir rayon icra hakimiyyətinin Akt zalında davam etdirilib.
Tədbirdə öncə Dövlət himni səsləndirilib. Sonra Ümummilli Lider Heydər Əliyevin və
torpaqlarımızın suverenliyi uğrunda canlarından keçmiş şəhidlərin xatirəsi bir dəqiqəlik
sükutla yad edilib.
Tərtər Rayon İcra Hakimiyyətinin başçısı Müstəqim Məmmədov çıxış edərək gəncləri
bayram münasibəti ilə təbrik edib, gənclərin ölkənin ictimai-siyasi həyatındakı rolundan,
mədəniyyət, təhsil, idman və digər sahələrdə əldə etdikləri uğurlardan danışıb.
Qeyd olunub ki, Ulu Öndər Heydər Əliyevin 1997-ci il fevralın 2-də imzaladığı Fərmana
əsasən, fevralın 2-si Azərbaycan Gəncləri Günü elan edilib. Həmin vaxtdan etibarən bu
gün, MDB məkanında və Şərqi Avropa ölkələri arasında ilk dəfə Azərbaycanda təntənəli
şəkildə qeyd edilməyə başlanıb. Bu sahədə də Azərbaycan bir çox ölkələri qabaqlayıb.
Belə ki, Azərbaycanda Gənclər Günü təsis edildikdən xeyli sonra gənclərin işləri üzrə
nazirlərin ümumdünya konfransının (1998-ci il avqustun 8-12-də) tövsiyəsi əsasında
BMT Baş Məclisinin 1999-cu il 17 dekabr tarixli qətnaməsi ilə 12 avqust - Beynəlxalq
Gənclər Günü elan edilib. Gənclərimiz Ümummilli Lider Heydər Əliyevin onlara ən
böyük hədiyyəsi olan bu günün təsis edilməsinin 28 illiyini qalib ölkənin məğrur və
qürurlu vətəndaşları kimi böyük ruh yüksəkliyi ilə qeyd edirlər.
Rayon rəhbəri gənclərə həmişə böyük diqqət və qayğı ilə yanaşan Ümummilli Lider
Heydər Əliyevin əsasını qoyduğu dövlət gənclər siyasətinin ölkə gəncliyinin inkişafında
dərin izlər buraxdığını, bu gün gənclər siyasətinin Ulu Öndərin ən layiqli davamçısı
respublika prezidenti cənab İlham Əliyev tərəfindən uğurla davam etdirdiyini bildirib.
Gənclərin sosial, iqtisadi və sair problemlərinin həllinə yönələn, onların öz
qabiliyyətlərinin inkişaf etdirmələrinə kömək edən fərman və sərəncamlar, qanunlar və
Dövlət proqramları gənc nəslin mütəşəkkil qüvvə kimi formalaşmasına, onların mənəvi-
ideoloji cəhətdən tam yetkinləşməsinə, sosial problemlərinin həllinə, faydalı
məşğulluğunun təmin olunmasına müsbət təsir göstərdiyini deyib. 44 günlük Vətən
müharibəsində Ali Baş Komandanın rəhbərliyi altında, məhz onun hakimiyyəti dövründə
yetişən vətənpərvər gənclərin 30 ildən sonra xalqımıza qələbə sevincini yaşatdığını ,öz
qanları-canları bahasına yeni tarix yazdıqlarını bildirib.
Rayon rəhbəri gənclərin respublikanın, eləcə də rayonun ictimai-siyasi həyatında
həmişə fəal iştirak etdiklərini vurğulayıb. Qeyd edib ki, yanvar ayının 29-da keçirilən
bələdiyyə seçkilərində də gənclər fəallıq göstəriblər. Bələdiyyəyə namizədliyi qeydə
alınan 84 nəfər gəncdən 42 nəfəri yüksək səs toplayaraq bələdiyyə üzvülüyünə
seçiliblər.
Sonra YAP rayon təşkilatının sədri Eldar Əsədov, Qarabağ Regional Gənclər və İdman
İdarəsində İnzibati Təşkilat sektorunun müdiri Anar Şahbazov gəncləri təbrik edərək,
onlara xoş arzularını çatdırıblar. Bildirilib ki, rayonda Gənclər Mərkəzinin, Uşaq-Gənclər
Şahmat Məktəbinin, süni örtüklü idman meydançalarının tikilib istifadəyə verilməsi, park
və istirahət guşələrinin yaradılması gənclərin asudə vaxtlarının səmərəli təşkilinə,
sağlam, hərtərəfli inkişaf etmələrinə xidmət edir.
Sonra söz gənclərə verilib. Azad Qaraqoyunlu kənd tam orta məktəbin müəllimi Könül
Məmmədova, Rayon Mərkəzi xəstəxanasında Poliklinika şöbəsinin psixoloqu Təranə
Əmiraslanova, könüllülərdən Əsmər Yusifli, Ləman Aslanova, Tərtər Peşə Məktəbinin
tələbələri İlahə Ələkbərova, Mirzə Baxşəliyev, gənc şair Əfqan Məmmədov, Sarıcalı
kənd tam orta məktəbinin müəllimi Nurlana Zeynalova, rayon Mədəniyyət Mərkəzinin
əməkdaşı Sona Köçərli və boks üzrə dördqat zona çempionu Pünhan Verdiyev çıxış
ediblər. Çıxışçılar gənclərin ölkənin ictimai-siyasi həyatında fəal iştirakından söhbət
açaraq, gənclərə dövlət tərəfindən göstərilən diqqət və qayğıya görə Azərbaycan
Respublikasının Prezidenti cənab İlham Əliyevə və Birinci vitse-prezident Mehriban
xanım Əliyevaya öz minnətdarlıqlarını bildiriblər.
Tədbirin sonunda rayonun ictimai-siyasi həyatında fəal iştirak edən bir qrup gəncə
Tərtər Rayon İcra Hakimiyyəti, YAP rayon təşkilatı və Qarabağ Regional Gənclər və
İdman İdarəsi tərəfindən Fəxri fərmanlar təqdim edilib.
"DİA-AZ"
