Milli Təhlükəsizlik Nazirliyinin (MTN 2015-ci ildə ləğv olunub - E.M) İstintaq Baş İdarəsinin sabiq rəisi Mövlam Şıxəliyev pensiya davasına açıb.

Musavat.com xəbər verir ki, Mövlam Şıxəliyev pensiya təminatı ilə əlaqədar Əmək və Əhalinin Sosial Müdafiəsi Nazirliyinin tabeliyində fəaliyyət göstərən Dövlət Sosial Müdafiə Fondunun Xüsusi Şərtlərlər Təyinat üzrə Mərkəzini məhkəməyə verib.


Birinci məhkəmə instasiyası onun iddiasını təmin etməyib. Mövlam Şıxəliyev apellyasiya şikayəti verib. Onun şikayətinə hakim Şərafət Məmmədovanın sədrliyi ilə baxılıb və təmin edilməyib.

Mövlam Şıxəliyev 2015-ci ildə "MTN işi" çərçivəsində həbs edilib. Ona Cinayət Məcəlləsinin 182.3.1, 182.3.2 (külli miqdarda əmlak əldə etmək məqsədi ilə mütəşəkkil dəstə tərəfindən hədə qorxu ilə tələb etmə), 294.3 (sübutları saxtalaşdırma), 311.3.1 (qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma) və digər maddələri ilə ittiham elan edilməklə barəsində məhkəmənin qərarı ilə həbs qətimkan tədbiri seçilib.


Bakı Hərbi Məhkəməsinin hökmü ilə Mövlam Şıxəliyev 12 il müddətinə azadlıqdan məhrum edilib. Bakı Apellyasiya Məhkəməsi hökmü qüvvədə saxlayıb. Mövlam Şıxəliyevin Ali Məhkəmədə bəraət almaq cəhdi baş tutmayıb.

2023-cü ildə Azərbaycan Prezidenti İlham Əliyev Mövlam Şixəliyevin, onunla birgə məhkum olunmuş MTN-in İstintaq Baş İdarəsinin şöbə rəisləri Sahib Ələkbərovun və Yasin Məmmədovun ali hərbi rütbədən və dövlət təltiflərindən məhrum edilməsi haqqında sərəncam imzalayıb.
Sərəncama əsasən Mövlam Şixəliyevin, Sahib Ələkbərovun və Yasin Məmmədovun ağır və xüsusilə ağır cinayətlər törətdiklərinə görə məhkum olunmaları barədə məhkəmə hökmünün qanuni qüvvəyə minməsi və Bakı Hərbi Məhkəməsinin təqdimatları əsas götürülərək imzalanıb.

Sərəncama əsasən, Mövlam Şixəliyev general-mayor ali hərbi rütbəsindən, 3-cü dərəcəli “Vətənə xidmətə görə” ordenindən, “Vətən uğrunda” və “Hərbi xidmətlərə görə” medallarından məhrum edilib.

Sahib Ələkbərov və Yasin Məmmədov “Vətən uğrunda” medalından məhrum ediliblər. Bu sərəncam imzalandığı gündən qüvvəyə minir.
Mövlam Şixəliyev 2021-ci ilin aprelindən həbsdədir.

Məhkəmə həmçinin Mövlam Şıxəliyevin general-mayor, digərlərinin də rütbə və təltiflərinin alınmasına qərar verib. Baş İstintaq İdarəsinin rəisi olmuş Mövlam Şixəliyev 12 il, istintaq idarəsinin rəis müavini olmuş Yasin Məmmədov 10 il 6 ay, istintaq idarəsinin 2-ci şöbəsinin rəisi olmuş Vüsal Ələkbərov 11 il 2 ay və istintaq idarəsinin metodiki yardım və kriminalistika şöbəsinin rəis müavini olmuş Sahib Ələkbərov 8 il müddətinə azadlıqdan məhrum edilib.

Cinayət işində ümumilikdə 14 milyon 292 min manat rüşvətdən, hədə-qorxu ilə adamların 5 milyon 77 min manatının ələ keçirilməsindən söhbət gedir.

Sabiq MTN-çilərin heç biri bu ittihamları qəbul etmir, özlərini təqsirli bilmirlər.

2015-ci ilin oktyabrında milli təhlükəsizlik naziri Eldar Mahmudov vəzifədən kənarlaşdırıldıqdan və xüsusi xidmətlərdə kadr təmizliklərindən sonra bu nazirliyin çoxsaylı əməkdaşı həbs edilib. Daha sonra, 2015-ci ilin dekabrında Milli Təhlükəsizlik Nazirliyi ləğv edilib.