Tramp mütləq şəkildə İrana zərbə endirəcək.
Bu sözləri Axar.az-a açıqlamasında politoloq Qabil Hüseynli ABŞ Prezidenti Donalt Trampın İranla bağlı siyasəti haqda danışarkən deyib.
Politoloq bildirib ki, Tramp prezidentliyi müddətində ABŞ-ın İrana zərbələr endirəcəyinin anonsunu vermişdi:
“Bu barədə ABŞ lideri İsraillə ciddi sövdələşmələrə girib. İrana endiriləcək zərbələr ümumi əməliyyat olacaq və əməliyyatda İsrail ordusu da iştirak edəcək. Bunu İranın Prezidenti Məsud Pezeşkian da Rusiyada olarkən etiraf etdi. İranda dünyəvi rejimin qurulmasını Tramp əsas vəzifələrindən biri sayır.
O ki qaldı Rusiyanın İrana dəstək verəcəyinə, bu ehtimallar inandırıcı deyil. Çünki Rusiya hazırda ağır bir müharibənin içindədir və onun hansısa ölkəyə hərbi, silah yardımı etməsi mümkünsüz görünür”.
Politoloq əlavə edib ki, İran hazırda təklənib və bu məsələdə ona heç kim kömək edə bilməyəcək:
“Məncə, İran parçalanmayacaq. Ancaq molla rejimi sona çatacaq, dinlə siyasət ayrılacaq, rejimin xarakteri dəyişəcək. Dünyəvi və demokratik rejimin qurulmasına cəhdlər ediləcək”.
Qeyd edək ki, Trampın milli təhlükəsizlik müşaviri Mayk Uolts Tramp administrasiyasının gələn ay İranla bağlı qərar qəbul edəcəyini deyib. İran isə öz növbəsində bu bəyanatlar fonunda ardıcıl genişmiqyaslı hərbi təlimlər keçirir.
