İlham Əliyev və Nikol Paşinyan
Bu gün, 12:53
Yanvarın 20-dən 24-dək dünyanın müxtəlif ölkələrindən olan liderlər İsveçrənin Davos şəhərində illik Dünya İqtisadi Forumunda əsas qlobal problemləri və gələn il üçün prioritetləri müzakirə edəcəklər.
“Cebehinfo.az” xəbər verir ki, Dünya İqtisadi Forumunun rəsmi saytının məlumatına görə, konfransda Azərbaycan Prezidenti İlham Əliyev də iştirak edəcək.
Ermənistanın Baş naziri Nikol Paşinyan da Davosda olacaq.
İclasda 130-dan çox ölkədən 350 hökumət nümayəndəsi, 60 dövlət və hökumət başçısı, o cümlədən Avropa Komissiyasının sədri Ursula fon der Leyen, Çin Baş nazirinin müavini Dinq Syuekyan və Almaniya Kansleri Olaf Şolz iştirak edəcək. Ukrayna Prezidenti Volodimir Zelenski çərşənbə axşamı xüsusi müraciət edəcək.
Toplantıda İsrail Prezidenti İsaak Hersoq və Fələstin Muxtariyyətinin Baş naziri Məhəmməd Mustafa, həmçinin İranın vitse-prezidenti Məhəmməd Cavad Zərif iştirak edəcək. Forumda Suriyanın müvəqqəti xarici işlər naziri Əsəd əl-Şeybani də iştirak edəcək.
Forumda, həmçinin biznes, beynəlxalq təşkilatlar, vətəndaş cəmiyyəti, elm, media və incəsənət nümayəndələri iştirak edəcəklər. İclasda ümumilikdə 3 min nümayəndə iştirak edəcək.
Forumda qlobal iqtisadiyyatda yeni artım mənbələri, əsas geoiqtisadi və texnoloji dəyişiklikləri nəzərə almaqla biznes strategiyalarının uyğunlaşdırılması, insan kapitalının inkişafına investisiya qoyuluşu və cəmiyyətin inkişafına töhfə verən iş yerlərinin yaradılması, ekoloji təmiz texnologiyaların tətbiqi və beynəlxalq səviyyədə həll yollarını inkişaf etdirmək üçün əməkdaşlıq etmək üçün yeni yollar tapılması müzakirə ediləcək.
Digər əsas mövzu süni intellekt olacaq. Forumda onun tənzimlənməsi məsələləri qaldırılacaq.
Geri qayıt