Trampın keçmiş müşaviri Maskı Ağ Evdən qovacağını deyib
Bu gün, 10:41
ABŞ-nin yeni seçilmiş prezidenti Donald Trampın keçmiş müşaviri Stiven Bennon İtaliyanın “Corriere della Sera” qəzetinə müsahibəsində sahibkar İlon Maskı “əsl pis oğlan” adlandırıb.
AzVision.az xəbər verir ki, Bennon Trampın yanvarın 20-də keçiriləcək andiçmə mərasiminə qədər sahibkar və milyarder İlon Maskı Ağ Evdən “qovmağa” çalışacağını bildirib.
“Onun Ağ Evə tam girişi olmayacaq. O, hamı kimi olacaq. “Texno-feodalizm” tərəfdarı olan İlon Maska Cənubi Afrikadakı vətəninə qayıtmağı tövsiyə edirəm. Onun yeganə məqsədi “trilyonçu olmaq” arzusudur”, - Trampın sabiq müşaviri iddia edib.
Xatırladaq ki, “Tesla” şirkətinin təsisçisi və sahibi , amerikalı milyarder İlon Mask Donald Trampın seçki kampaniyasına 250 milyon dollardan çox pul xərcləyib. Mediada yayımlanan xəbərlərə görə, ABŞ-nin gələcək prezidentinin xarici liderlərlə telefon danışıqlarında da iştirak edən sahibkar yeni administrasiyanın formalaşmasına təsir göstərir. Mənbələr siyasətçinin komandasında Maskın bu proseslərdə həddən artıq fəal iştirakından narazılıq yarandığını iddia edirlər.
2024-cü ilin sonunda “The New York Times (NYT)” qəzeti Maskın Donald Trampın Floridadakı “Mar-a-Laqo” malikanəsinin ərazisində icarəyə götürdüyü koteclərdən birində yaşadığını yazmışdı.
Geri qayıt